Davao City – Dakung supak ang anti-crime watchdog organization nga Volunteers Against Crime and Corruption (VACC) sa sugyot nga mahatagan og ‘second chance’ si former Calauan Mayor Antonio Sanchez kinsa nakumbikto sa sala nga rape-murder niadtong 1993.
Sumala ni VACC President Boy Evangelista, dili kuwalipikado si Sanchez sa ‘second chance’ kun parole tungod kay walay pagbag-ong nahitabo sa iyang kinabuhi bisan kon napaslak na kini sa bilangguan sa taudtaud nga panahon.
Matud ni Evangelista, ang konkretong basihan mao ang padayon nga pagdula sa droga ug iligal nga binuhatan niini sulodd mismo sa prisohan.
Dugang ni Evangelista, sakit alang sa mga kabanay sa mga nahimong biktima sa kanhi mayor nga maabswelto ang naulahi sa iyang pito ka life sentence.
Segun ni Evangelista, sakripisyo ug kinabuhi ang ilang giula dihang ilang gitabangan ang mga pamilya sa mga biktima aron madut-an og kaso ug mabilanggo si Sanchez.
Busa, sakit alang sa crime-buster organization nga mahatagan og parole si Sanchez kinsa gikonsidera nga mas angay madugta sa prisohan sa tibuok niyang kinabuhi silbing bayad sa kasal-anan nga iyang nabuhat.
Pasidaan ni Evangelista ngadto sa gobyerno nga posibleng maguba ang atong criminal justice system ingon man magpadasig sa uban pang mga kriminal nga muhimo og krimen sanglit maka-avail man gihapon sila sa Good Conduct Time Allowance kun GCTA.
Una nang gitataw sa palasyo sa Malacañang nga walay plano si Pres. Rodrigo Duterte nga tugtang makagawas ang maong kontrobersyal nga colono.
RadyoMaN Joel Viray
