Davao City – Responsibilidad sa mga ginikanan ang pagtudlo og maayo nga pamatasan sa ilang mga anak aron pagdaku nila, mahilayo sila sa salawayon nga buhat niining moderno nga panahon.
Obligasyon sa mga ginikanan nga bantayan ang ilang mga anak aron dili ma-impluwinsiya sa unsa man ang ilang makita sa silida sa telebisyon ug sa social media.
Bisan og dunay kagawasan ang mga kabataan sa ilang tan-awon sa telebisyon apan katungod sa mga ginikanan nga giyahan ang ilang mga anak.
Namatikdan nga nawala na ang maayong pamatasan sa mga kabataan karon gumikan sa mga artista nga nag-perform og sexual ug law-ay nga buhat sa ilang mga teleserye sa mga telebisyon.
Apan bisan paman og dayag ang kamatuoran daw buta’g bungol ang mga opisyal sa MTRCB ug sa KBP sa pagsita sa mga telebisyon ug sa mga radyo sa Pilipinas nga wala na sila mahisubay sa balaud.
Apan sumala ni Akbayan Partylist Representative Tom Villarin nga dili na angay pahinumdoman ang mga tv ug mga radio networks tungod nasayod na sila sa balaod ug unsa ang angay nilang buhaton.
Segun ni Villarin, maluwas pa ang bag-ong tubo gikan sa dili maayo nga impluwensiya sa tv ug sa radyo diin kaya pa ihulma ang maayo nga pamatasan sa ilang mga anak.
Ang pag-uswag sa nasud nag-agad kini sa paghulma sa mga kabataan apan kun mapakyas ang mga ginikanan sa paggiya sa ilang mga anak hayan dulom na unya ang kaugmaon sa nasud.
Busa gidasig ni Villarin ang mga ginikanan nga praktison ang mga kaanakan sa maayong pamatasan sulod sa panimalay aron mao kana ang masilsil diha sa ilang alimpatakan ug madala ngadto sa ilang pagdaku.
Namatikdan usab nga naka-angkla kanunay diha sa mga ginikanan ang pagtudlo og maayong pamatasan sa ilang mga anak nga kun unsay makita sa kinaiya sa mga kabataan resulta lamang kana sa praktis sulod sa ilang tagsatagsa ka mga panimalay mismo.
RadyoMaN Joel Viray
