Davao City – Pabor ang grupong North and South Van Federation (NSVF) sa mga vans-for-hire sa gitinguha karon sa gobyernong nasyunal nga salbaron ang na-dislokar nga mga drivers sa pampublikong transportasyon pinaagi sa pag-hire kanila nga mahimong COVID-19 ‘contact tracers’ sa mga gisuspetsahang nataptan sa maong kagaw.
Sa pakighinabi kaniya sa programang ‘Straight to the Point,’ gisugilon ni NSVF Board of Trustees member Rommel Bajador nga i-utilisar sa kagamhanan ang mga drivers isip contact tracers sa mga tawong gisuspetsahang COVID-positive.
Matud ni Bajador, basta programa sa gobyerno, suportado kini nila sanglit nasayod sila nga kaayohan sa tanan ug pagtabang ang gilaraw sa kagamhanan ngadto sa ilang mga kaubanang drivers nga nakulban og kaldero dala sa makamatay nga pandemic.
Mas maayong pahimuslan sa mga drivers ang tanyag nga panginabuhian iyawat na lang nga mu-income sila ning panahon sa krisis ug kalisud samtang wala pa gayud sila hingpit mahibalik sa normal nilang pasamada, dugang ni Bajador.
Ang awhag sa maong organisasyon ngadto sa gobyerno mao nga dili i-mandatory kon pugson ang mga drivers nga mudawat sa nasangpit nga matang sa panarbaho ug tugtang boluntaryo lamang ang pagdawat niini.
RadyoMaN Joel Viray
