Davao City – Uyon kaayo si CAMACOP Minister Pastor Dominador Cabuenas nga mapasar ang House Bill No. 4888 nga giduso ni Rizal 2nd District Congressman Juan Fidel Felipe Nograles.
Segun sa pastor, sa presenteng balaud, bugtong kababayen-an ug kabataan lamang ang gipanalipdan gikan sa managlahi nga matang sa pagpangabuso pinaagi sa Republic Act No. 9262 kun Violence Against Women and Children or VAWC Law.
Hinoon matud ni Cabuenas, ang kamatooran mao nga daghan usab sa mga bana karon ang gi-abuso sa ilang mga asawa apan pa-it palandungon kay walay madangpan kun walay kasumbongan ang mga nahimong harassed or battered husband.
Gi-amyendahan niini ang RA 9262 ug kung mahimo nga balaud, pwede nang kasohan ang mga asawa nga mangulata sa ilang mga mister.
Dugang ni Cabuenas, sa panahon karon kinahanglan parehong protektahan sa balaud ug sa gobyerno ang mga bana ug ang mga asawa sanglit ang abuso walay gipili nga estado ug gender sa usa ka tawo.
Dugang sa pastor nga dili makapawala sa dignidad sa mga bana kung magduso kini og kaso batok sa mga nangharass nga misis nga maghingabin na ang ilang mga pagpangabuso ngadto sa ilang mga kapikas sa kinabuhi.
Nagtoo si Cabuenas nga mas makatabang pa hinoon kini nga mapabarug pag-usab ang awtoridad ug respeto nga gihatag sa Diyos ngadto sa mga bana isip pangulo sa pamilya.
Gitataw usab ni Cabuenas nga dili kini komporme nga isipong bayolasyon ug wad-an og katungod ang mga asawa nga kuhaon ang mga ATM sa sweldo sa ilang mga bana.
RadyoMaN Joel Viray
