Ni: -R.M-
Makapahimulos na sa dili madugay ang mga beterano ug mga sakop sa pamilya niini sa serbisyo sa mga hospital nga gidumala ug gipanag-iyahan sa kagamhanang probinsiyal sa Zamboanga del Norte human usab gipasar ug giaprubahan ang legal nga kasulatan may kalabot na niini.
Kini maoy maayong balita nga nasayran atol sa gipahigayon nga regular session sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles karong bag-o pa lamang.
Si Board Member Ruth M. Brillantes ang mipasupot sa upat (4) ka managkalahi nga resolusyon nga naghatag sa otoridad ug gahum ni Governor Roberto Y. Uy nga mopirma sa upat (4) usab ka managkalahi nga Memorandum of Agreement (MOA) sa ngalan sa probinsiya tali na ni LTGEN. Ernesto G. Carolina, AFP (Retired), Administrator sa Philippine Veterans Affairs Office (PVAO) nga nagabase sa Camp General Emilio Aguinaldo, Quezon City.
Diha sa lain-lain nga MOA, makapahimulos na sa serbisyo sa hospital ang mga beterano lakip na ang mga pamilya niini sa mga tambalanan sa gobyerno diin sila haduol nga namuyo nga mao ang: Sibutad Municipal Hospital, Sergio Osmeña Municipal Hospital, Manukan Medicare and Community Hospital ug ingon man Sibuco Municipal Hospital nga pulos sakop sa Zamboanga del Norte.
Samtang ang Philippine Veterans Affairs Office (PVAO) ang mobayad sa balayronon sa hospital ug medical care lakip na ang dependents niini base sa actual billing nga dili molabaw sa kantidad nga Php 1, 500.00 sa kada adlaw sa matag pasyente ug ingon man dili molabaw sa 45 ka adlaw nga hospital confinement sa matag tuig.
Kini nga PVAO hospitalization program ang molungtad sulod sa lima (5) ka tuig lamang depende kung bag-ohon na usab ang kontrata may kalabot na niini. -30- (M.L)
