iFM Laoag – Binisita ni Vice Governor Cecilia Araneta Marcos ni National Living Treasure Magdalena Gamayo idiay Lumbaan Bic-bica, Pinili, Ilocos Norte.
Ni Magdalena Gamayo, agtawen ti nasurok 90 ken residente ti nasao a lugar ket nabigbig a kas “National Living Treasure” ken nakagun-od iti “Gawad sa Manlilikha ng Bawan Awardee” babaen iti National Commission for Culture and the Arts (NCCA) gapu ti panangpreserbar ken panangiburayna ti kadawyan a panagabel.
Kadua ni VG Marcos dagiti dua a pagayamna manipud iti Metro Manila a nangbisita kenkuana (Magdalena) kas paset ti panangitandudo ti bise gobernador iti panagusar ti produkto nga abel kadagiti espesial nga okasion a mabalin nga atendaranda.
Malaksid iti dayta, gagem ti bise gobernador a personal a makita ti wagas a panagabel ni Nana Magdalena ken dagiti dadduma pay a padana nga inna nga agab-abel ti barangayda.
Iti agdama, addan ti naestablisar a maymaysa a lugar a pagabelan dagiti inna iti abay ti balayda Nana Magdalena ken nakabukel payen ti maymaysa nga asosassionda.
Magustoan ni Marcos ti agus-usar kadagiti nagduduma a produkto manipud ti inabel kas ti bags, palda, ken dadduma pay kas panangbigbig a ti abel ket maysa kadagiti produkto a maipagtangsit ti pada nga ilokano. Daytoy pay ti unusarna a tela a nangbungon iti tugaw nga ususarenna iti Sangguniang Panlalawigan kas mangidulo iti konseho.
Bernard Ver, RMN News
