Davao City – Ang ‘Via Dolorosa’ naghulagway sa kalisdanan, paglutos ug kamatayon ni Hesus ibabaw sa krus didto sa lugar sa Golgota kapin dos mil na ka tuig ang nakalabay.
Gumikan sa dakung kaluoy ug paghigugma sa Diyos sa kalibutan kun sa mga tawo, gipas-an ni Hesus ang nanghinobrang sala sa tawo ug giantos ang pasakit ibabaw sa krus.
Sumala ni Reverend Jason Logronio, Malungon Alliance Church Senior Pastor, ang pag-antos ni Kristo maoy pamaagi sa Diyos aron bayaran ug luwason kitang tawo gikan sa pagka-ulipon sa sala ug hatagan og kinabuhing walay katapusan.
Kung buot isipon, paingon na unta sa impiyerno ang tawo isip bayad sa pagpakasala apan tungod sa grasya sa Diyos, Iyang gitubos ang tawo gikan sa kamatayon-espiritwal pinaagi sa kamatayon ni Kristo.
Walay kapasidad ang tawo aron ilibre ang iyang kaugalingon gikan sa kapungot, paghukom, silot ug kalaglagan nga gi-andam sa Diyos alang sa tanang masinupakon sa Iyang kabubut-on.
Maong bisan nasayod si Kristo nga dili ti-aw ang iyang agi-an nga pag-antos, gituman sa gihapon Niya ang kabubut-on sa Amahan aron lamang mahugasan ug maputli ug maluwas gikan sa silot ang mga tawo pinaagi sa gi-ulang dugo sa Ginoo.
Dugang ni Logronio nga kun wala ang kaluoy ug gugma sa Diyos, walay duda nga ang tanan mag-atubang gayod sa paghukom ug silot-kamatayon nga ipahamtang ug ipakanaug sa Ginoo pag-abot sa tukmang panahon.
Nanghinaut si Logronio nga sa paghinumdom sa kamatayon ni Kristo, makahinuklog unta ang tanan diha sa paghinulsol ug pagpangayo og kapasayloan pinaagi sa pagdawat kang Kristo isip Manluluwas ug Diyos sa kinabuhi ug mangalagad nga manitud-anon samtang may panahon pa sa paghimo niini.
Gipasidan-an daan ni Logronio ang tanan nga ang impiyerno makalilisang nga dapit diin walay katapusan ang mga pag-antos nga dangatan sa mga tawong wala muila sa Diyos sa ilang kinabuhi.
RadyoMaN Joel Viray
