MOISES PADILLA – Dakop sa checkpoint ang Vice-Mayor sang Moises Padilla nga Ella Garcia subong gid lamang nga gab-i las 7 sa Crossing Magallon.
Upod ni Garcia ang iya nga bana sakay sa Mitsubishi Strada nga gray nga wala sang plate number.
Sunokay PCInsp. Allan Reloj nakuha sa salakyan ni Garcia ang duha ka short firearms nga ginapatihan kalibre 45 nga pistola kag may isa pa ka granada.
Ginpahayag pa ni Reloj nga isa ka checkpoint ang ila ginpatigayon mga las 6 sang gab-i sa diin ila ini ginpatigayon sa masanag nga lugar malapit sa tyangge, 30 metros gikan sa intersection.
Dugang pa ni Reloj nga wala nagkooperar si Garcia sa ila nga checkpoint rasun nga may natabo nga komosyon.
Si Garcia ang paguwa na sa banwa sang ginpatigayon ang amu nga checkpoint padulong na kon tani sa Bacolod.
Sa interbyu sang dyHB sa utod nga Mark Garcia, illegal ang ginpatigayon nga checkpoint bangod pwersa nga ginpangita ang bag sa diin didto nabutang ang armas nga lisensyado sa ngalan sang iya bana nga Philip.
Iya pa ginpabutyag nga sang ginpusasan ang iya utod, indi pa pulis ang naga-uyat apang may armas kag sang nag-inabot pa ang ila pamilya, ginpalukpan pa ini Reloj nga ginkakibot man sang ila mismo iloy.
Sang nainterbyu man sang dyHB si Vice-Mayor Ella Garcia iya gindeny nga ila granada ang narecover. Ginpakita niya man ang iya kamot nga puno sang labhag sang nagbutungay sila sang bag.
Suno sa bana nga Philip may lisensya ang iya armas apang wala sila sang granada nga ginatago.
Sang nagligad nga Agosto, gin-aresto man ang bodyguard ni Garcia nga si Jefe Baladhay, 34, sa Poblacion 3 sa diin narecover sa iya ang mga bala, armas, shabu kag marijuana.
