Davao City – ‘Generalized’ ra kaayo ang pamahayag ni Sen. Cynthia Villar nga bogo ang mga batang Pinoy gumikan sa kakulang sa produksiyon sa gatas dinhi sa nasud.
Sumala ni Ateneo De Davao University (ADDU) Prof. Ramon Beleno, usa lamang ka por ciento sa kinatibuk-ang nutritional requirement ang pagtomar og gatas alang sa total development sa usa ka bata.
Gipunting ni Beleno nga ang malnutrisyon makapugong sa total development sa pangutok sa usa ka bata hatod usab sa kalisud ug kapobrehon sa mga ginikanan niini.
Dugang pa ni Beleno, nakadugang sa factors ang kadaghan sa mga estudyante sa usa ka classroom hinungdang dili matutukan og maayo sa mga magtutudlo ang paglambo sa pag-estudyo sa usa ka bata.
Segun sa professor, bisan og competent ang magtutudlo apan kun overcapacity na gani ang usaka classrooms ug kulang ang training, dili gayod molambo ang mga batang Pinoy diha sa pagbasa ug uban pang learning competencies.
Usaka global survey result niadtong 2018 nagpakita nga ang Pilipinas anaa sa ika-79 nga puwesto isip pinaka-ubos sa katakos sa mga batang estudyante sa natad sa reading literacy and comprehension.
RadyoMan Joel Viray
