Davao City – Mas nabati na sa katawhan ang tumang kalisud sa kinabuhi ang padayon nga pagsaka sa inflation rate sa nasud sa Pilipinas human mas misaka pa kini sa 6.4% sa buwan sa Agosto itandi sa 5.7% niadtong Hulyo ubos sa administrasyon ni Pres. Rodrigo Duterte.
Kini ang obserbasyon ni Akbayan Partylist Representative Tom Villarin nga mas nigrabe pa ang nasinati nga kalisud karon sa katawhan tungod sa pagsutoy sa presyo sa mga nag-unang produkto sama sa bugas ug uban pa.
Sumala ni Villarin nga 75% sa sweldo sa mga trabahanteng Pilipino gigahin alang sa pagkaon apan gumikan sa pagsaka sa presyo sa mga palaliton karon lisod ug dili na paigo ang usa ka buwan nga sweldo sa mga wage earners.
Gibasol ni Villarin ngadto sa kapakyas sa mga economic managers ni Duterte ang 6.4% inflation rate nga nagpa-hinay sa ekonomiya ug nagpagmahal sa mga palaliton diin ang direktang apektado mao mga ang yanong lungsuranon.
Nagtoo ang magbabalaud nga usa sa mga hinungdan sa pagsaka sa inflation rate mao ang paghunong sa mga manufacturers nga mohimo og mga produkto sama sa sweet beverages nunot sa TRAIN Law.
Ang maayong buhaton sa kagamhanan aron makibhangan ang epekto sa inflation rate mao nga pakusgan ang asistensya alang sa mga kabus ug tabangan ang mga mag-uuma diha sa pagtikad sa ilang kahumayan aron makaani og mas daghang cavan sa bugas matag ektariya sa luna, segun sa magbabalaud.
RadyoMaN Joel Viray
