Davao City – Nagpadayon ang pag-monitor karon sa National Disaster Risk Reduction and Management Council (NDRRMC) kabahin sa paglampornas ni bagyong ‘Vinta’ sa nagkadaiyang parte sa Mindanao.
Sa interbyu kang NDRRMC spokesperson Romina Marasigan, gibutyag niya nga mo-agi sa tibuok Mindanao ang maong bagyo diin epekto niini mao ang makusog nga bul-og sa tubig-ulan ug makusog nga pagkuso-kuso sa hangin sa mga areas sa rehiyon.
Gani kagahapong adlawa (Disyembre 21, 2017), nagpagula og Memorandum 154 ang NDRRMC nga ‘forced evacuation’ sa mga lugar nga apektado sama sa Albay, Camarines Sur, Sorsogon, Antique, Aklan, Capiz, Iloilo, Negros Occidental, Eastern Samar, Leyte, Northern Samar, Southern Leyte, Agusan del Norte ug Sur, Dinagat Islands, Surigao del Norte ug Surigao del Sur diin apil sa public storm warning signals sa Philippine Atmospheric, Geophysical and Astronomical Services Administration (PAGASA).
Segun ni Marasigan, gilaumang mobiya sa Philippine Area of Responsibility (PAR) ang bagyong ‘Vinta’ kaadlawon sa kapaskohan.
Gi-awhag usab sa tigpamaba sa NDRRMC ang katawhan nga kung adunay hulga sa landslides, mamahimong mo-evacuate gilayon alang ra usab sa ilang personal nga kaluwasan.
Ning panahon sa atong pagbalita, gidabo-dabohan pag-ayo sa tubig-baha ang mismong sentrong bahin sa Cagayan de Oro.
Sa kasamtangan, wala pay na-monitor ang PAGASA nga bag-ong posibleng bagyo apan nagpahinumdom nga dili mokumpiyansa ug padayong mag-maigmaton.
Pikas bahin, gipadangat karon ni Pres. Rodrigo Duterte pinaagi sa usa ka prepared Yuletide Message ang iyang pangaliya alang sa pagkab-ot sa kalinaw, pag-rekognisa sa sakripisyo sa atong mga kasundaluhan ug mga tinugyanan sa balaud ingon man sa nagpadayong krisis nga gisinati karon sa entero katawhan gumikan sa duruha ka dagkung mga bagyong nilampornas sa Pilipinas.
RadyoMaN Jason Amisola
