Davao City – Kasong parricide ang atubangon sa 19-anyos nga lalaki tungod sa pagpatay sa iyang kaugalingong amahan sa Purok 1, Sitio Datalpitak, Barangay Colonsabac, Matanao, Davao del Sur pasado alas-8 sa gabii niadtong Miyerkules (Hulyo 7, 2021).
Giila ang biktima nga usa ka alyas Dong, 37-anyos, usa ka differently abled person (dili na makakita) ug ang suspetsado mao ang iyahang kaugalingong anak.
Sa interbyu sa DXDC RMN Davao kang Police Major Rhuel Barachina, Chief of Police (COP) sa Matanao Municipal Police Station (MPS), gisaysay niini nga hubog nga niuli ang suspek sa ilang balay ug dinhi na nagkalalis ang duha human gimaymayan kini sa iyang amahan tungod sa iyang sige og inom diin kini miresulta sa pagpanunggab sa suspek pinaagi sa sundang.
“Pila ka minuto while ga-argue sila, kalit na lang niya gidunggab ang iyang papa sa tiyan. Mao ‘toy nakahitabo sa iyang hinanaling kamatayon,” sulti ni Barachina.
Subay sa series of test nga gihimo sa suspek pinaagi sa standard operating procedure sa ospital, gideklarang lango kini sa alcohol ug wala gikataho nga kini lulong sa droga.
Balhog na sa Matanao detention facility ang suspek samtang gipanawagan sa police official sa katawhan labi na sa mga anak ang paghatag og respeto sa ilang ginikanan ug kung mahimo istoryahan kung aduna may mga bangi o wala pagsinabtanay sulod sa panimalay aron malikayan ang brutal nga mga insidente.
“Mas nindot gyud unta kung ibato nato ang taas nga respeto sa atong mga ginikanan or sa mga elders nato kay sama anang nahitabo karon nga iyaha mismong amahan ang iyahang nakutloa’g kinabuhi. So, mura og wala na mahisubay sa tama nga moral ba,” mensahe sa pulis.
RadyoMaN Kirby Manzon
