Ginbawian na sang kabuhi ang vocalist sang Tyrant Band nga naaksidente kaina sang kaagahon (Pebrero 10) sa Tabucan, Mandurriao.
Ginkilala ang biktima nga si Chelsea Alba Espinosa, tumandok sang Roxas City, apang temporaryo nga nagapuyo sa Montecillo Subdivision sa banwa sang Pavia.
Suno kay Police Staff Sgt. Louie Alilano, imbestigador sang Mandurriao Police station nga natabu ang aksidente mga alas 3:30 kaina sang kaagahon samtang nagamaneho sang iya salakyan nga Toyota Hatchback ang biktima gikan sa area sang Molo padulong sa Mandurriao sang makabunggo ini sa pader sang Mohler Building.
Gindala sa Western Visayas Medical Center ang biktima matapos nakaangkon sang pilas sa nawala sini nga tiil.
Subong man, alas 12:13 kaina sang udto, gindeklarar ini sang doktor nga napatay.
Suno kay Alilano nga base sa iya pagpangusisa, wala nakasuksok sang seatbelt ang biktima kabangdanan nakabunggo ang ulo sini sa dashboard sang salakyan bangud sa kabaskog sang impact nga posible nakaangkon ini sang head injury.
Dugang pa ni Alilano nga posible napiyungan si Espinosa samtang nagamaneho kabangdanan nga nakabunggo ini sa nasambit nga building.
