Davao City – Sukad pa sauna ug bisan hangtud karon, anaa gihapo’y mga reklamo batok sa mga kandidato nga himuon ang tanan aron lamang makalingkod sa posisyon nga gihandum diha sa gobyerno diin musangpot sa pagpamalit sa boto sa mga inosenteng mga botante.
Unsa ba ang vote-buying? Kini mao ang pagtanyag sa kandidato sa botante og kwarta o unsa mang butang sa pagpabor sa usa ka pulitiko o kaha grupo bugti sa ilang boto. Apan, hugot nga gidili ang maong sistema sa pulitika ug makonsidera kining usa ka election offense subay sa Omnibus Election Code.
Nasayran nga masilotan gayud ang kinsa mang indibidwal, institusyon o grupo nga misaad og kwarta o unsa mang tanyag sa botante bugti sa iyang boto sa midagang kandidato.
Gipasabot ni Atty. Krisna Samantha Caballero, spokesperson sa Commission on Election (COMELEC)-XI nga usa gayud ka election offense ang maong matang sa sistema. Kinahanglan lamang nga mag igmat ug mamahimong alerto sa maong mga iligal nga binuhatan.
Nasayran nga angay usab nga papirmahon sa usa ka under oath ang akusado diin kung mapamatud-an kini sa nag-akusa pinaagi sa pagpresenta og mga lig-on nga ebidensya, gilayon nga mapasakahan og kasong kriminal gawas sa election offense nga nalapas niini sa buhatan. Kanunayng pahimangno, ampingan ug bantayan ang balota karong 2019 midterm election.
RadyoMaN Kirby Manzon
