Davao City – Karong adlawa maoy oportunidad sa haring lungsod aron iyang botaran ang kandidato nga sa iyang pagtuo sinsero sa pagpangalagad sa barangay.
Sumala sa Davao Association of Catholic Schools (DACS) nga mahinungdanon kining adlawa alang sa mga botante kay mao na kini ang adlaw aron hukman ang mga kandidato nga nagpapili sa barangay.
Matud ni DACS head Jimmy Lou Dela Vera nga gikinahanglan magmaalamon ang matag botante sa pagboto kay nakadepende aning buluwanong adlaw ang kaugmaon sa ilang barangay.
Gipasidan-an ni Jimmy ang mga botante nga una muadto sa mga polling precincts siguruhon una nga iya nang na-ilhan ug nakilatis ang usa ka kandidato nga tugyanan sa iyang boto.
Dili angay himoong sukaranan sa pagboto ang name recall kun sikat nga kandidato kun buot gayod natong makabaton og lingdong ug tarong nga opisyal kansang tinud-anay mangalagad sa katawhan.
Ang pakiglambigit sa kalihukan sa politika ug pag-aninaw sa dagan sa panahon makatabang og dako aron makatimbang og maayo ang usa ka maalamon nga botante.
Aminado si Dela Vera nga bisag unsa ka lig-on sa baruganan sa botante kaya kaayo kini pahuyangon sa sapi nga sagad mahitabo sa katapusang gabii sa kampanya kun ginatawag nila nga kamang sa kagabhion.
Busa bililhon kaayo nakasandayong kanunay ang konsensiya sa kinabuhi sa mga botante aron sa oras sa pagboto ang mapili kadtong dunay kasingkasing sa pagpangalagad sa barangay.
Nagkataas na ang kahimatngon sa mga botante karon nga kun kaniadto hatagan lang og tinapa ug noodles ug NFA nga bugas dayon ibaligya ang boto sa walay paghunahuna kung unsang klase nga kalidad serbisyo ang mahatag sa bulingit nga kandidato kung makalingkod na kini sa katungdanan sa barangay.
RadyoMaN Joel Viray
