Sa interbyu sa DXDC RMN Davao kang Ret. Col. Hernando Las, Vices Regulation Unit chief, hatagan lang og tulo ngadto sa usa ka semana ang mga violators nga mubayad sa multa nga P3,000 sa unang offense human kini sila naisyuha’g citation tickets aron dili sila mapasakaa’g kaso.
Segun ni Las, giticketan usab ang establisyemento ug kung masayran nga kapila na kini kahigayong nadakpan irekomendar nila sa Business Bureau ang pagpasirado.
Segun ni Police Major Marvin Hugos, Station Commander sa San Pedro Police Station gisakay na sa mobil ug gidala sa istasyon ang mga violators dihang aduna nay reklamo nga nadawat ang mga awtoridad gikan sa mga concerned citizen batok sa maong establisyemento.
Gipangbuyag na ang maong mga batan-on ug gipapagawas na kini sa establisyemento subay sa pag-enforce sa Liquor Ban Ordinance apan giingong ang mga violators namalik pa ug nagpadayon sa ilahang aktibidad.
Sa Liquor Ban Ordinance, gidili ang pag-consume og mga ilimnon sa pampublikong lugar gikan alas 1:00 sa kadlawon hangtud alas 8:00 sa buntag.
Usa ka 13 anyos ang na-rescue sa kapulisan samtang lakip usab giisyuhan sa Vices Regulation Unit (VRU) og citation ticket ang establisyemento nga matud sa kapulisan nasayrang wala kiniy business permit ug posibleng manubag tungod sa giingong pagsilbi’g ilimnon sa minors.
Kahinumduman, gimanduan ni Davao City Mayor Sebastian Duterte ang Davao City Police Office sa estriktong pag-imposar sa liquor ban ug pagbantay sa mga resto bars dinhi sa syudad sa Davao human usab sa nahitabong mga kagubot ug insidente tali mga bar goers niadtong nakalabayng mga tuig.
RadyoMaN Aimee Guinita
