Roxas City – Nagapati ang mga kapulisan nga nahulog sa dako nga giha sang balay ang anum ka bulan nga lapsag.
Suno kay Police Master Sargeant Ramil Arcangeles sang Roxas City PNP, nagaguha sa ila imbestigasyon nga aksidente nga nahulog ang lapsag sa giha sang salog kag dingding sang balay samtang nagakatulog ang iya iloy.
Nahibaluan nga wala na sang kabuhi sang nakit-an ang anum ka bulan nga lapsag nga babaye sa idalum sang balay sa Barangay Tanque, Roxas City mga alas 8:00 kahapon sang aga.
Suno sa iloy sang lapsag nga si Sabel Untayao, gindulog pa sini ang iya anak kagab-i kag pasado alas 3:30 sang kaagahon, natalupangdan sini nga wala na sa iya luyo ang lapsag sang nag-aga na.
Sa bulig sang pila ka mga residente, ginpinangita ang amo nga lapsag apang wala gid ini nakita.
Nagtawag sila sang albularyo sa pagpati nga ginkuha sang aswang ang bata bangud wala man sang iban nga tawo nga nagsaka sa ila balay.
Matapos ang pila ka oras nga pinangita sa lapsag, naglutaw ini sa suba, mga pila ka metros ang distansya sa balay sang pamilya Untayao. Gindala pa sa Roxas Memorial Provincial Hospital (RMPH) ang lapsag apang gindeklarar ini nga patay na.
