Roxas City, Capiz – Ginbaha sang nagkatuhay nga mga reklamo ang pamunoan sang Metro Roxas Water District(MRWD) halin sa mga konsumidor angut sa kadulaan sang supply sang tubig sa kabilogan nga Roxas City halin sang Enero 19 sang gab-e tubtob Enero 20, 2019.
Ini ang resulta sang naka-schedule nga water interruption sang MRWD bangud sa ginpatigayon nga interconnection kag transfer sang 600mm pipe sa area sang Brgy. Adlawan Bridge.
Maluwas sa Roxas City, apektado man sang kadulaan sang supply sang tubig ang banwa sang Ivisan kag Panay.
Samtang alas 11:20 kagab-e, nag-resume na ang normal operation sang Paslang Water Treatment Plant kadungan sang pag-operate sang lima ka mga pumps.
May kaangut sini, nagpangayo snag pag-intindi ang tagdumalahan snag MRWD sa mga konsumidor. Ginalauman nga ma-eksperiensyahan sa gihapon ang mahina nga pressure ukon wala sang supply sang tubig sa mga matag-as nga lugar.
Nahibaloan nga base sa orihinal nga advisory sang MRWD, magadugay lamang sang 14-oras ang nasambitan nga olubrahon apang bangud sa welding operations, maulanon nga panahon kag indi mapaiway nga rason, na-extend ini sang pila ka oras.
