Davao City – Pangunahan mismo sa Philippine Institute of Volcanology and Seismology (PHIVOLCS) ang himuong ‘Walk the Fault’ dinhi sa dakbayan sa Davao karong June 24, 2019, adlawng Lunes.
Sa pakighinabi sa DXDC RMN Davao kang Marvin Samson, Civil Defense Officer III sa Office of the Civil Defense (OCD)-XI, gikumpirma niini nga pangunahan mismo ang maong aktibidad ni Dr. Renato U. Solidum, Jr., Undersecretary for Disaster Risk Reduction and Climate Change, DOST ug Officer-In-Charge sa PHIVOLCS.
Gibutyag ni Samson nga tutukan sa maong aktibidad ang Brgy. Bago Oshiro nga nagbaton sa Lacson Fault line ug ang Brgy. Mintal nga nagbaton sa Dacudao fault line.
“During the walk the fault, magbutang og mga marker.. kay dili lang agency ang maghimo ani kundi mismo ang mga katawhan nga lumulupyo duol sa faultline. Then kung ma-trace na nila, ma-locate na asang fault line, at least makabalo na sila unsay ilang mamahimong mga pamaagi para maging prepared sila,” saysay ni Samson.
Segun sa opisyal nga dili matagna ang linog rason nga kinahanglang adunay igong kahibalo ang katawhan labi na kadtong nahimutang sa fault line kung unsa ang pamaagi sa pagpangandam panahon sa maong sitwasyon.
Nasayran nga nagbaton og 14 ka active fault lines ang Davao region diin unom sa maong ihap ang nahimutang sa syudad sa Davao.
RadyoMaN Kirby Manzon
