Davao City – Gikatakdang ipahigayon karon nga quarter dinhi sa syudad sa Davao ang “Walk the Fault” nga pangunahan mismo sa Philippine Institute of Volcanology and Seismology (PHIVOLCS).
Sa pakighinabi sa DXDC RMN Davao kang Leslie Francisco, spokesperson sa Office of the Civil Defense (OCD)-XI, gibutyag niini nga pangunahan mismo ni PHIVOLCS Executive Director, Renato Solidum ang maong aktibidad nga gikonsiderang bililhong aksyon batok sa linog pinaagi sa pagsuta sa mga establisementong nahimutang sa fault line.
Segun ni Francisco nga magsugod ang aktibidad sa Mintal, Davao City kung asa gipahigayon ang 1st Quarter National Simultaneous Earthquake Drill (NSED) niadtong Pebrero 21, 2019 diin nahimutang ang maong lugar sa Dacudao fault line.
“Naa tay umaabot nga ‘Walk the Fault’ sa Mintal. Mukanaog diri si sir Solidum, ang Director sa PHIVOLCS, makigkuyog siya nato. Atong subayon gyud kung unsa nga mga establishments ang naa sa faultline, gikan sa Mintal pababa.” saysay niini.
Dugang pa sa opisyal nga himuon ang “Walk the Fault” gawas pa sa himuong 2nd Quarter nga NSED ug mga eathquake drills nga ginapahigayon sa matag local government units (LGUs), volunteer groups o kaha private initiatives.
Nasayran nga nagbaton og 14 ka active fault lines ang Davao region diin unom ka fault lines ang nahimutang sa syudad sa Davao.
RadyoMaN Kirby Manzon
