Walo ka mga heavy equipment sang isa ka construction company sa Sultan Kudarat, ginsunog sang ginaaligar miyembro sang NPA

Halos indi na mapuslan ang walo ka mga heavy equipment nga ginapanag-iyahan sang Janmerc Builders Construction, matapos sunugon sang nagpakilala nga miyembro sang New People’s Army ukon NPA sa Barangay Hinalaan, Kalamansig, Sultan Kudarat.
Nagakantidad naman sa P30 milyon ang natuga nga danyos sang ginsunog nga walo ka mga ekwipo.
Suno kay Sultan Kudarat Spokersperson PCI Ronnie Dardo, una nga ginsunog sang nasambit nga grupo ang lima ka mga heavy equipment sa Sitio Midpanga lakip na ang duha ka unit sang payloader, isa ka unit sang mixer, isa ka unit sang saddam dump truck kag isa ka pison, dungan man nga ginsunog ang isa ka backhoe kag duha ka bulldozer sa Sitio Lower Saniag sa nasambit nga banwa.
Ginatayaan suno pa sang armas luthang ang mga tawo sang kumpanya sang nasambit nga grupo, apang wala naman ang mga ini ginsakit.
Extortion naman ang isa sa ginalantaw nga anggulo sang PNP sa insidente matapos nga wala suno pa nakontento ang nasambit nga grupo ukon wala nahatag ang ila nga hingyo.
Gilayon naman nga nagpatigayon sang pagsinapol ang LGU Kalamansig, PNP, AFP kag Philippine Marines agud nga hatagan sang seguridad ang mga trabahante sa road project sang gobyerno nga nagakonekta sa duha ka mga banwa sa Sultan Kudarat.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>