Misaka na sa kinse (15) ang kumpirmadong kaso sa COVID-19 sa lalawigan sa Misamis Occidental kagahapon.
Kini tungod sa nadugang nga walo ka mga kaso diin ang usa niini usa ka puya nga nagpangedaron og siyam ka bulan nga gi-admit sa usa ka tambalanan.
Ang uban kanila, tungod kay walay gipakitang simtomas, anaa kini gibutang sa isolation facility ug hugot nga gi-monitor sa medical team.
Matud pa ni Misamis Occidental Governor Philip Tan, pito sa maong mga bag-ong kaso mga locally-stranded individual (LSI) kinsa naka-uli gikan sa Cebu samtang ang usa, residente sa lungsod sa Tudela nga walay exposure o walay history nga nakabiyahe gawas sa probinsiya.
Miingon si Tan nga kamulo pa nilang gisusi sa contact tracing kung matawag ba nga usa ka local transmission ang kaso sa maong residente.
Ang puya anaa kini sa maayong kahimtang ug wala ra maglisod sa pag-ginhawa. (Divina M. Suson, June 23)
