Dipolog City – Nisurender na sa Dipolog city police station ang usa ka lalaki wanted sa kasong rape human sa gipagawas nga kamandoan ni Presidente Rodrigo Duterte sa tanan law enforcement agency sa nasud aron sa paglutos kaniya.
Pasado alas 2:00 kagahapon sa hapon nigawas sa gitagoan ug boluntaryong nitahan sa iyang kaugalingon, ang rape suspek nga si Roy Vincent Hamoy Rosal, alias “Arvi ” 29 anyos, minyo mulupyo sa A&B subdivision, Lower Turno ning dakbayan sa Dipolog kon diin giubanan kini sa iyang amahan.
Ang pagsurender ni Arvi subay sab sa warrant of arrest nga giluwatan ni Hon. Rogelio D. Laquihon, Presiding Judge sa Regional Trial Court Branch 7, Dipolog City niatdong Septembre 28, 2017 sa duha ka ihap nga kasong rape ubos sa criminal case No. 21937 ug 21938 nga walay girekomendang piyansa.
Subay sa gipanumpaang salaysay sa 16 anyos nga dalaga, kaduha ka higayon sumala pa siyang gilugos sa balay sa maong suspek niadtong buwan sa Marso 2015.
Nasundan pa ang pagpanlugos human hulgaa nga patyon ang biktima kon musumbong kini sa iyang ginikanan.
Ulahi nang mahibal-an sa mga ginikanan ang mga panghitabo ning tuiga ug gilayon kining nagpasaka ug kaso sa korte.
Kahibaloan human nalutsan ug warrant of arrest ang suspek wala na kini igkita hinungdan gilayong nagpagawas ug pabuya sa kantidad nga usa ka milyon kapesos ang pamilya ug higala sa biktima ug nagpatabang kang Pres. Duterte alang sa dinalian pagsikop niini. (-r.m-)
