Davao City – Gisuportahan karon sa Presidential Anti-Corruption Commission (PACC) ang rebelasyon ni Pres. Rodrigo Duterte nga kuyanap gihapon ang kurapsyon sa kagamhanan ning mga tungora.
Matud ni PACC Chairman Dante Jimenez, tinuod ang giingon ni Duterte sa nakalabay’ng 4th State of the Nation Address kun SONA niadtong Lunes nga grabe gihapon ang paghitak sa kurapsiyon diha sa atong gobyerno.
Segun ni Jimenez, nagtakdo sa ilang listahan ang mga buhatan nga ginganlan ni Duterte sa iyang SONA sa pinaka-kurakot nga mga buhatan sa gobyerno karon.
Dugang niini nga nag-una sa ilang listahan ang mga ahensiya sa BIR, DPWH, BoC, Philhealth, SSS, PagIBIG ug uban pa nga pinakakurakot nga mga buhatan sa gobyerno.
Ang pinakadaghang napasakaan og kasong kurapsyon nagagikan sa Luzon area ehemplo niini ang kapin 100 ka personahe sa Bureau of Customs gani aduna usa’y secretary kun kalihim nag-atubang sa samang asunto.
Gipasigarbo ni Jimenez nga epektibo ang ilang gigamit nga taktika ug istratehiya sa paglutos sa mga elected ug appointed nga mga opisyales kinsa kumpirmadong nangawat sa kaban sa katawhan.
Gani sukad namugna ang PACC niadtong Oktubre 4, 2017, mikunhod ang ihap sa mga kawatan sa kagamhanan itandi sa niaging mga administrasyon.
Gitug-an ni Jimenez nga daw sama sa lig-on nga pader ang problema sa kurapsyon sa Pilipinas kay lisod kaayo kini gun-ubon gumikan sa halawom na niini nga gipanukaran.
Dili maputol ang ugat sa kurapsiyon hangtud nga padayong mudawat ang tawo sa ipanghatag sa mga pulitiko pananglitan panahon sa kampanya diin padaugon nila ang mga traditional politicians matag piniliay.
Duha ka solusyon ang nakita ni Jimenez diha sa pagbuntog sa kamangtas sa kurapsiyon: Una, silotan og kamatayon ang mga opisyal sa gobyerno nga nagapangawkaw.
Ug ikaduha, ilisan ang presenteng sistema sa panggobyerno paingon ngadto sa Pederalismo aron ang matag lokalidad, adunay igong gahum sa pagdumala sa ilang kaugalingong panudlanan alang sa hinanali nga kalamboan sa ilang tagsa-tagsa ka mga lugar.
Dili sama karon nga centralized ug ang magbuot sa distribusyon sa salapi mao ang central government diin halapad kaayo ang kahigayonan nga makahimo og anomaliya sa pondo ang hingtungdang mga opisyales.
RadyoMaN Joel Viray
