TACLOBAN CITY – Ginbuno gamit an pisaw an usa nga lalaki ha Brgy. 93 Bagacay, Tacloban City dida han Sabado, August 31.
Ginkilala an biktima nga hi Gilbert Abarca, 20 anyos, usa nga construction worker, residente ha nasabi nga lugar.
Ginkilala naman an suspek nga hi Eric Amasan, 22 anyos, usa nga construction worker, taga Davao City.
Sumala kan PCapt. Marjorie Manota, tagapagyakan han Tacloban PNP, nag-iirignom samtang nakanta ha usa nga videoke bar hi Gilbert ngan hi Eric upod an iba nga mga kasangkayan hini.
Nahuram na unta han songbook an grupo ni Eric pero waray magpahuram an grupo ni Gilbert ngan ginpuspos pa an mao nga songbook, dida nagtikang an ira away.
Nagkaada hin komprontasyon, bumunot hin pisaw hi Eric ngan nabuno ha wala nga sugbong hi Gilbert.
Nadara ha hospital an biktima para magpatambal.
Kakasuhan unta an suspek hin slight physical injury pero waray na mag interes an biktima, ginpapirma nala an suspek han waiver nga diri na ini mautro ngan mabayad han hospital expenses.
An maupay nga karantahay nagresulta lugod hin pamuno, abiso ni PCapt. Manota, diri igsaka ha ulo an gin-iinom para diri magresulta hin kapaso han ulo ngan ha krimen.
