Kapulisan walay lead sa pagpusil patay sa watchman sa Bit-os
Gipusil patay sa duha ka mga mamumuno ang watchman sa DPWH particular sa view deck sa Brgy. Bit-os ning syudad sa Butuan, pasado alas 8 ang takna kagabie.
Giila ang biktima nga si Junrey Banday, hingkod ang edad, watchman sa DPWH ug residenti sa Purok 5, Brgy. Amparo ning syudad sa Butuan.
Gi-asoy sa kauban sa biktima nga samtang naglingkod-lingkod sila sa view deck kalit lang misaka ang usa ka lalaki ug walay langan mipusil sa biktima.
Misaka usab ang ikaduhang suspek ug mitiwas sa pagpusil sa makadaghang higayon hinungdan nga nalop-og ang biktima ug diha-diha nakabsan sa iyang kinabuhi.
Gipalikay ang kauban sa biktima ug gisultihan nga wala siya’y labot mao’ng magpalayo na lamang.
Human sa pagpusil daling misibat ang duruha sakay sa wala masayring klase sa motorsiklo padulong sa wala usab masayring direksyon.
Ang pamahayag sa kauban sa biktima sa interview sa RMN DXBC Butuan.
Sa karon blangko pa ang kwerpo sa kapulisan sa pag-ila sa mga suspek ug kung unsay motibo sa pagpusil patay sa biktima (with report archer capadeso/ivy falcons).
