Davao City – Karon pa lang gikabalak-an na sa mga eksperto nga posibling makasinati og krisis sa tubig ang daghang mga kanasuran sa kalibutan gumikan sa walay undang nga kalambuan ug paglobo sa populasyon.
Apan ang Davao City Water District (DCWD) wala mabalaka niini tungod bastante ang tinubdan sa tubig gikan sa dagkong kasapaan nga nagpalibot sa dakbayan.
Gawas ani, aduna usay ground water sa Dumoy Toril nga maoy nagsupply sa 65% sa populasyon sa siyudad karon.
Sumala ni DCWD spokesperson Attorney Bernard Delima, sa ground water pa lang pupaigo na aron maka-inom ang dul-an dos milyones ka tawo sa dakbayan.
Dugang ni Delima, walay angay’ng kagul-an ang mga Dabawenyo kay kung matigayon man ang krisis sa tubig, ang siyudad magbaha sa igong supply sa tubig bisan pa og grabe ang development karon.
Nasayran nga ang mga batid sa giyera nakaaninaw na daan nga ang ugat sa pag-ulbo sa kaguliyang sa daghang kanasuran sa kalibutan manukad na sa inilugay sa pagkaon ug sa tubig.
Adunay 71% sa kalibutan nga puno sa tubig, apan 2.5% lang niini ang gikunsidera nga limpiyo diin 1% lang ang puwedeng mainom nga maoy ginasaw-an sa kapin pito ka bilyon ka tawo sa kalibutan.
Base sa pagtuon sa mga eksperto,pagtungtong sa tuig 2025 dinha na muigo ang krisis sa tubig sa siyam ka lugar sa pilipinas ug usa na niini ang Davao.
Ang massive development, pagka-upaw sa kabukiran,pagsaka sa populasyon ug kainit sa panahon ang gitumbok nga hinungdan kung ngano muhampak ang krisis sa tubig sa siyam ka lugar sa nasud.
Sigun ni Delima nga mas mubastante pa ang suplay sa tubig pag-abot sa 2021 kay nianang panahona magsugod na og operate ang tamugan river nga kasamtangang gi-develop na karon.
Ang Tamugan River kaya musuplay og kapin gatos milyones ka cubic metros matag tuig diin nagpasabot nga pupaigo bisan pa og magdaghan ang mga establisiminto ug magsaka ang populasyon sa siyudad.
Subay sa pagtuon, ang pamilya nga dunay lima ka sakop muhurot og 120 ka litro diin ang usa ka miyem-bro nagkinahanglan og 24 litros alang sa tibuok adlaw.
Apan bisan tuod og gipanalanganin sa Dios og tubig ang siyudad naghimo gihapon og lakang ang DCWD aron mapreserba pa ang mga kasapaan sa pagsiguro nga dili mahubsan og tubig ang dakbayan pag-abot nianang panahon.
Ang tawo kaya maka-survive sud sa duha ka buwan bisan og walay pagkaon basta adunay tubig sanglit 70 porsento sa lawas likido.
Busa pagdasig ni Delima sa mga Dabawenyo, magdaginot ug dili mag-usik-usik sa tubig ug ampingan ang kinaiyahan ug ang kalasangan aron ang tanan dili mamatay sa huwaw.
RadyoMaN Joel Viray
