Atol sa Regular Session sa Konseho kagahapong adlawa, gisugyot sa mga Konsehal ngadto sa DCWD ang paglusad og Water Summit aron dinhi matuki ang kasamtangang suliran nga gisagubang sa DCWD ug nga sa ingon mapangitaan og solusyon ang problema sa suplay sa tubig sa syudad.
Matud ni DCWD Spokesperson Joanna Duhaylungsod nga natuhog sa kadaghang konsehal ang ilang gi-isplikar kung ngano milatas sa pipila ka barangay sa Distrito Uno ang pagwagtang sa suplay sa tubig uban sa rekomendasyon sa pagpahigayon og Water Summit Activity sa umaabot nga mga adlaw.
Giingon ni Duhaylungsod, ang Water Summit kabahin lang sa mga sugyot sa mga konsehal sa katuyoan nga maturokan ang pagtubag sa matag karon og unya nga water interruption maingon ang mas pagpalapad sa serbisyo sa patubig ngadto sa kasigbit nga mga barangay partikular sa Distrito Dos nga hangtud karon wala pa maalagari sa Water District.
Kahinumdoman, miatubang ang pipila ka opisyal sa DCWD sa plenaryo sa konseho aron pangayoan sila og eksplinasyon ngano miabot sa Talomo, Bago Aplaya, ug pipila ka porsiyon sa Matina area ang kalit nga paghinay sa pressure ngadto na sa pagkawagtang sa suplay sa tubig niadtong miaging semana.
Subay sa pagbatbat ni Duhaylungsod, nadaot kon naguba ang usa sa duha ka Well Water System nga nagsuplay og tubig sa 9 mil ka konsumante diin niadtong panahona anaa sa 4,500 kon 50% sa mga konsumante ang naapektaran sa pagka-guba sa water system.
Giingon ni Duhaylungsod nga mibalik na sa normal ang 24/7 nga agas sa gripo human sa pila ka adlaw nga pag-ayo sa naguba nga Well Water System ug busa wala na’y nadawat nga mulo gikan sa mga konsumante ang ilang buhatan karong panahona.
RadyoMaN Joel Viray
