Kasuko ang gibati karon sa 14 anyos nga kinamaguwangang anak ngadto sa ilahang amahan kinsa gitudlong responsable sa kamatayon sa ilahang inahan.
Gipasalig niini ngadto sa iyahang nipanaw na nga mama nga dili niya pasagdan ang iyahang mga manghod nga nag-edad 12, 10 ug 6 anyos.
Gipanganti sa apuhan nga sagupon ang iyahang upat ka mga apo ug ubanon kini ngadto sa ilahang pinuy-anan sa Los Amigos, Tugbok District diin sila na-relocate.
Sa interbyu sa DXDC RMN Davao kang Police Major Gillian Rose Birondo, hepe sa Women and Children Protection Desk (WCPD) aduna kiniy lawom nga epekto ang grabe ug sensitibong kaso ngadto sa mga bata busa kinahanglan kini’g hinanaling aksyon.
“Naa gyuy abuse sa sulod sa ilahang panimalay kay kung makita nga abusive ang inyong pamilya imong mama ug papa, naa niy psychological effect sa mga bata. Naa gyuy epekto sa psychological pwede sila mahimo nga bayolente pud or sundugon pud nila. Mahimo nga normal sa ilaha ang ingana nga panginabuhi so dapat naay intervention, counselling para mamahimo silang normal,” segun ni Birondo.
Matud ni Birondo, nakatutok sila sa kapadulgan sa mga bata ug psychological ug spiritual intervention.
RadyoMaN Aimee Guinita
