Davao City – Tungod sa trough sa low pressure area nga nakaapekto sa Mindanao, posible na usab ulanon ang dakong bahin sa Mindanao karong adlawa partikularminte unyang hapon.
Kini ang gibutyag ni Honey Perez sa Pag-Asa Davao atol sa interview sa DXDC RMN Davao kaniya.
Base sa lakat sa panahon karong adlawa, ang tibuok dapit sa Mindanao makasinati sa madag-umon nga kalangitan inubanan sa katag katag nga pag ulan, kilat ug dalugdog tungod sa trough sa low pressure area.
Hinay ngadto sa kasarangan nga hangin ang magagikan sa sidlakan ngadto na sa amihanang sidlakang direksyon ug hapsay ngadto sa kasarangan ang balud sa kadagatan.
Kagahapon, subli na usab giulan ang pipila ka dapit sa Mindanao sama dinhi sa syudad sa Davao nga nakasinati og street floods diin kahinumduman nga base sa weather forecast nga gipagula kagahapon nga posibleng ulanon gayud ang Mindanao tungod sa Easterlies.
Sa pikas bahin, padayon ang monitoring nga ginahimo karon sa Office of Civil Defense kun OCD XI og aduna bay mga dautang panghitabo ang natala sa nagkadaiyang lugar sa rehiyon onse nga naapektuhan sa pagdaut sa panahon kagahapong adlawa.
RadyoMaN Renz Barbarona
