Dinas, Zamboanga del Sur – Patay ang usa ka welder human kining gipusil alas 7:00 kagabii sa Purok Sampaguita, Barangay Poblacion, Dinas, Zamboanga del Sur.
Giila ang biktima nga si Robert Potes Quajao, 55-anyos, welder, lumulupyo sa nasangpit nga lugar.
Sa inisyal nga imbestigasyon nasayran, samtang kamulo sa pagpanirado sa iyang welding shop ang biktima kalit nga nibutho sa lugar ang mga suspek og gipusil ang biktima gamit ang calibre 45 nga pistola base sa mga basiyo sa bala nga nahipos sa dapit nahitabuan.
Patay ang biktima nga nakahiagom og samad pinusilan sa nagkadaiyang bahin sa lawas.
Blangko pa ang kapulisan sa lungsod sa Dinas sa motibo sa maong pagpamusil hinoon naglusad na og hot pursuit operation alang sa posibleng pagdakop sa mamumuno.
