Maga – file sang official protest ang WVRAA Little League Baseball Team sa Central Office sang Dep-ed kasunod sang bias nga deisiyon sang umpire sa championship game sa tunga sang Region 6 batok sa team sang Northern Mindanao sang nagligad nga adlaw Mayo 3, sa Palarong Pambansa 2019.
Suno kay Coach Benjie Bandada maathag sa kuha sang video ang pag-tag sa player sang Western Visayas sa runner sang Northern Mindanao sa base apang sa baylo nga out, gin-save sang umpire ang runner rason nga ginkatingala sang catcher sang region 6 ang desisyun sang umpire.
Gin- eject sang umpire ang catcher sang Team WVRAA kaupod si coach Benjie Bandada kag ginpatawgan sila sang pulis matapos nga gin-alegar sang umpire nga ginbuyayaw siya sang catcher nga nag-eksplikar lang sa iya matapos nga gin tag niya ang runner sang Northern Mindanao rasun nga wala na nila mapadayun ang hampang.
Ginpanindugan ni Bandada nga basi sa rules, pananglitan nga ma- tag sang catcher ang runner ginakonsiderar na ini nga out kag wala na ginakinahanglan nga magtapak pa sa base ang tiil sang catcher, kasubong man ang paggwa sa runway sang player sang Northern Mindanao.
Natabo ang insedinte sa entrance sang 6th inning sa Championship game sang elementary baseball boys sa diin lunsay 0 ang score sang magtimbang nga bahin.
Bangud sa hitabo, dismayado ang mga players sang Rehiyon 6 kalakip man ang mga officials kag maestro nga nagsuporta sa mga atleta.
Ginatugyan subong sang bilog nga team sa sports supervisor kag sa legal council sa Dep-ed 6 ang pagpasaka sang formal nga reklamo batok sa mga umpire.
Gindeklarar nga kampiyon ang Northern Mindanao kag ikaduha lang ang Western Visayas apang wala na sila nagsaka sa awarding para kuhaon ang award bangud sang naka-pending nga protesta nila.
Subong nga hapon nagpauli na ang mga delegado sang Rehiyun 6 halin sa venue sang hinampang sa syudad sang Davao.
(Screen Grab Photo)
