Davao City – Nahatagan og paglaum ang mga supporters ni Davao City Mayor Sara Duterte-Carpio human kini nag-withdraw sa iyang Certificate of Candidacy (COC) pagka-alkalde sa Davao City sa 2022 Elections.
Dako ang pagtuo sa netizens nga nadungog ni Mayor Sara ang panawagan sa iyang supporters sa pagdagan sa national position sunod tuig, diin walay undang ang panawagan kaniya sa pagkandidato sa mas taas nga posisyon sa umaabot nga piniliay.
“Davao people keep sacrificing their great leaders for the betterment of the entire country. We really appreciate it and we know that through them. Our nation will be great again,” kumento sa netizen nga si Kesiah Gapuz.
Pasado alas-2 sa hapon kagahapong adlawa (November 9, 2021) sa dihang miabot si Mayor Inday sa Commission on Elections (COMELEC)-Davao ug mianunsyo sa iyang withdrawal pagka-alkalde.
Mupuli sa maong posisyon si Vice Mayor Sebastian “Baste” Duterte nga una nang nag-withdraw sa iyang COC pagka-bise mayor alas-10 sa buntag kagahapon ug nag-file og certificate of substitution pagka-mayor pasado alas-3 sa hapon sa susamang adlaw.
“Ngayong hapon wini-withdraw ko ang aking kandidatura sa pagka-Mayor ng Davao City. Si VM Baste ang papalit sa akin. Ito lamang po muna. Maraming salamat po,” pamahayag sa Mayor sa iyang Facebook page.
Si Atty. Melchor Quitain usab ang gipili sa mga Duterte nga mukandidato pagka-bise alkalde puli ni Baste.
“I have filed my withdrawal as Vice Mayor candidate of Davao City. I hereby nominate Atty. Melchor Quitain Jr. as my substitute. I am deeply grateful to the Dabawenyos for the support they have given me all this time. I have no other details to share at the moment. Thank you,” pamahayag usab sa VM Baste.
Samtang, emosyunal nga migakos si Mayor Sara sa mga empleyado sa City Hall human sila nagbaton og panagpulong kagahapon sa hapon, diin madunggan usab ang pagdasig ug suporta sa mga trabahante sa nahimong desisyon sa alkalde bisan pa man og mingawon na ang nahisgutan sa presensya ni Mayor Sara sa lokal nga panggamhanan.
Aduna pay hangtud November 15, 2021 alang sa withdrawal ug substitution sa mga kandidato sa 2022 Local ug National Elections ug diri na usab mahibal-an ang sunod nga plano ug pinal nga desisyon sa presidential daughter.
RadyoMaN Kirby Manzon
