Davao City – Daghang mga pagsulay ang ilang gi-agian, tuo’g wala nga mga isyu nga gi-atubang sa sektor sa kababayen-an sa tuig 2019.
Sama na lamang sa paglutaw sa ‘online shopping’ sa mga babaye kun ginabaligya nga kababayen-an online, nagkadaghan nga ihap sa teenage pregnancy, pagpanglugos, pagpang-abuso pisikal man o emosyonal sulod o gawas sa nasud ug daghan pang uban.
Sa atong pakighinabi kang Mindanao Migrants Center for Empowering Actions Inc. Executive Director Inorisa Sialana-Elento, daku ang iyang panghinaut nga dunay kausaban sa kahimtang sa kababayen-an sa pag-entra sa Bag-ong Tuig.
“Malaumon kini nga tuig tungod sa pagtan-aw nga daghan ang nahitabo, sa pag tan-aw sa kababayen-an nga anaa sa kahimtang sa pagpangabuso, pag-daugdaug ug unsa pa nga klase nga matawag nato ang babaye nga anaa sa disadvantaged nga position. Hinaut nga daghang kamot nga mutabang sa pag-implementar sa mga balaud, mutabang sa pag-amoma sa kababayen-an nga anaa sa di maayong kahimtang,” segun ni Elento.
Dugang paglaum ni Elento nga makunhuran usab ang ihap sa mga gi-abusong kababayen-an gawas sa nasud kun abroad.
“Partikular sa OFWs, daghang presentahe nga gi-abuso sa gawas sa nasud, hinaut nga pangandaman ang kaugalingon sa di pa mugawas sa nasud kay ang hagit nga gawas sa nasud, mas daku kay nag-inusara ug layo kaayo ang gitawag nga suporta sa gobyerno man o pamilya,” dugang ni Elento.
Nangaliya usab ang maong grupo nga atubangon nato ang daghan pang hagit sa 2020 apan dili usab sayangan ang oportunidad nga mutindog ang kababayen-an ug makig-abin sa ubang hut-ong sa katilingban aron masulbad ang gi-atubang nga mga hagit ug suliran.
Hinoon, dili lang man mga isyu ang mga natala sa tuig 2019 gumikan aduna man usay maayong marka nga magpabilin sa katawhang Pilipino sama na lamang sa kaisog nga gipakita sa usa ka babayeng trial judge nga si Quezon City RTC Presiding Judge Jocelyn Solis-Reyes kinsa way kukahadlok nga mihukom sa mga principal suspects sa kontrobersyal kaayong Ampatuan Massacre case.
Daghang mga Pilipina nakadayeg sa talagsaong kaisog ni Judge Reyes kinsa midawat sa kaso nga gibalibaran sa ubang mga huwes ug mahistrado gumikan sa kadelikado sa mamahimong hukom.
Hinaut unta nga bisan managka lahi-lahi man ang estado sa kinabuhi, mamahimo kitang isog diha sa pag-atubang sa tanang mga pagsulay sa atong kinabuhi.
Ug sa pagsugat nato sa Bag-ong Tuig, sugaton usab nato ang mga paglaum nga ang kababayen-an makabangon sa bisan unsa mang hagit nga bitbit sa tuig 2020.
Ingon pa sa Proverbs 31:25, “She is clothed with strength and dignity and she laughs without fear of the future.”
Barug kababayen-an, sukol kababayen-an!
RadyoMaN Renz Barbarona
