Davao City – Init nga gilantugian karon sa hut-ong sa mga kababayen-an ang pag-legalize sa Divorce Bill nga anaa na karon sa ikatulong pagbasa sa kongreso.
Nabahin ang baruganan sa mga women sector tungod kay adunay pabor ug aduna usay supak sa rason nga bugtong kamatayon lang ang makabuwag sa magtiayon ug dili ang balaod sa yuta.
Si Parents Mobilization Action Group (PMAG) Pres. Febe Matthew nagbutyag natunga ang barugan sa iyang mga ginsakpan sa hisgutanan sa diborsyo diin pareho nagsabwag og punto ang matag kampo.
Suma sa ubang mga asawa, unsa pa may dugayan kun dili na gyod magkasinabot ug gubot ang pamuyo nan mas maayo buwagon na lang mag-asawa pinaagi sa pag-legalize sa diborsyo.
Apan gi-alkontra kini sa ubang kababayen-an kay alang kanila ang giusa sa kaminyoon dili puwede buwagon sanglit ang matag problema puwede man sulbaron sa malinawon nga istoryahanay.
Kun si Matthew ang pasuginlon, dili kini uyon sa diborsyo kay puwede kini gamiton nga rason sa mag-atiyon aron pursige ang pagbungkag sa ilang pagpuyo.
Giingon sa mag-asawa nga sila Pastor Joey ug Pastora Grace Cabilbigan nga sa kaminyoon dili malikayan ang bangi kana nunot sa daghang problema ug lahi-lahi nga personalidad.
Suma ni Pastor Joey Cabilbigan, ang ilang sekreto sa pagmentinar sa maayong relasyon mao ang kumuni-kasyon ug pag-adto sa bugnaw’ng lugar kung asa puwede silang magpalabay sa kainit sa ilang away.
Sigun ni Pastora Grace, importante kaayo nga dunay magpa-ubos kay mao kini ang tubig sa pagpatay sa kalayo sa bikil ug niana dili gayod matay-og ang relasyon inay mas muliog pa kini.
Busa nagka-uyon ang mag-asawa nga supakon ang pag-legalized sa divorce bill sanglit dili kabubut-on sa Dios ang pagpukan sa kaminyoon ug pagbungkag sa pamilya.
Ang pagmaymay Matthew ngadto sa mga mag-asawa nga sige og away mao nga mag-istoryahanay ug humanon ang problema sa malinawon nga paagi aron mapreserba ang ka-sagrado sa kaminyoon ug dili tugtan ang diborsyo nga mogun-ob niini nga maoy gustong mahitabo sa mga magbabalaud sa nasud.
RadyoMaN Joel Viray
