CAUAYAN CITY — NANAWAGAN SI NUEVA VIZCAYA LONE DISTRICT REPRESENTATIVE ATTY. TIM CAYTON NG AGARANG AKSYON MULA SA DEPARTMENT OF ENVIRONMENT AND NATURAL RESOURCES–MINES AND GEOSCIENCES BUREAU (DENR-MGB) KAUGNAY NG MGA REKLAMONG PAGLABAG NG WOOGLE CORPORATION SA KANILANG EXPLORATION ACTIVITIES SA DUPAX DEL NORTE.
BATAY SA MGA REKLAMONG NATANGGAP NG KONGRESISTA, NAGKAROON UMANO NG PAG-UPROOT AT PAGTANGGAL NG MGA PUNO AT HALAMAN SA LUGAR NG EKSPLORASYON, GAYUNDIN NG PANGHIHIMASOK SA ILANG PRIBADONG ARI-ARIAN AT KABAHAYAN. DAHIL DITO, IGINIIT NI CAYTON ANG AGARANG IMBESTIGASYON AT KUNG SAKALING MAPATUNAYANG MAY NILABAG ANG KOMPANYA, AY IMINUNGKAHI NIYA ANG SUSPENSYON NG OPERASYON NITO ALINSUNOD SA EXPLORATION PERMIT (EP) NO. 00003011.
SAKLAW NG NATURANG PERMIT ANG MAHIGIT 3,100 EKTARYA SA DUPAX DEL NORTE AT ITO AY IBINIGAY NG MGB ALINSUNOD SA PHILIPPINE MINING ACT OF 1995. BINIGYANG-DIIN NG MAMBABATAS NA BAGAMAN LEGAL ANG EXPLORATION PHASE, MAY MALINAW NA LIMITASYON ITO SA BATAS, PARTIKULAR SA TEKNIKAL AT PINANSYAL NA KAKAYAHAN NG KOMPANYA AT HIGIT SA LAHAT SA PANGANGALAGA SA KALIKASAN.
KAUGNAY NITO, HUMILING DIN SI CAYTON NG CERTIFIED TRUE COPY NG EXPLORATION PERMIT AT WATERSHED MAPS BILANG BAHAGI NG KANYANG PAGHAHANDA SA PAGHAHAIN NG “NUEVA VIZCAYA AS WATERSHED HAVEN PROTECTION BILL,” NA LAYONG PALAKASIN ANG PROTEKSYON SA MGA WATERSHED NG PROBINSYA NA NAGSISILBING PANGUNAHING PINAGKUKUNAN NG TUBIG NG HILAGANG LUZON.
GIIT NI CAYTON, KAILANGANG TIYAKIN NA ANG EXPLORATION PHASE AY HINDI MAKASISIRA SA KAPALIGIRAN AT HINDI MAKAAAGRABYADO SA MGA MAMAMAYAN. ANIYA, ANG MAHIGPIT NA REGULASYON SA BAWAT YUGTO NG EXPLORATION ANG SUSI UPANG MAPANATILI ANG BALANSE SA PAGITAN NG PAG-UNLAD AT PANGANGALAGA NG LIKAS-YAMAN.
