Davao City – Gikalipay sa Trade Union Congress of the Philippines (TUCP) ang pagpirma ni Pres. Rodrigo Duterte sa bag-ong balaud nga ‘Telecommuting Law’ kun ‘Work-from- Home’ kansang unod magtugot sa trabahante nga sa balay na lang magtrabaho ga-mit ang modernong teknolohiya.
Aminado si TUCP Spokesperson Alan Tanjusay nga dugay usab silang naghulat nga malagdaan ni Duterte ang maong balaud kay daku kining tabang sa mga mamumuo kinsa nagtinguha nga sa balay na lang maghimo sa ilang mga tahas.
Apan gipasabot ni Tanjusay nga applicable lamang kini ngadto sa mga nanarbaho sa Business Process Outsourcing kun call centers ug wala kini direktang epekto sa work force kinsa maoy main bulk kun mayoriya sa mga trabahante sa mga industriya sa nasud.
Dugang ni Tanjusay nga dili magpakunhod sa kalidad ug efficiency sa trabaho sa mga workers ang bag-ong work modality inay mas bentaha pa hinoon kini sa mga kumpanya kay makadaginot sila sa kunsumo sa kuryente matag adlaw, espasyo sa opisina ug daghan pang uban.
Sa pagkakaron, nagtinabangay ang TUCP, ang nasudnong gobyerno pinaagi sa DOLE ug ang mga employers diha sa paghikutar sa Implementing Rules and Regulation (IRR) diin kabahin sa ilang gituki og maayo sa unod sa palisiya mao ang ensaktong sweldo ug mga benepisyo alang sa mga mamumuo ubos sa bag-ong sistema sa pangempleyo.
RadyoMaN Joel Viray
