Davao City – Suportado karon sa grupong Multi-Sectoral Organization ang rekomendasyon nga himoong mandatory ang COVID-19 test sa tanang mga trabahante sa Pilipinas.
Segun ni Multi-Sectoral Organization focal person Jess Pagaran, mas maayong apilon ang tanang mga employees diha sa swab test inay sa rapid test aron tukma gayud ang resulta sa estado sa panglawas sa mga trabahanteng mo-report sa ilang worksites.
Kaluwasan sa tanan ang pinakarason ni Pagaran nganong ni-pabor kini nga himoong mandatory ang COVID-19 test nga dakung tabang aron ma-kontrolar ang dugang pagkuyanap sa virus diha sa trabahoan.
Kahinumdoman nga sa usaka pamahayag sa Inter-Agency Task Force on the Management of Emerging Infectious Diseases (IATF-EID), ninggula ang datos nga kasagaran sa tinakdanay kun infection naa diha nagapanghitabo sa mga workplaces, partikularmente diha sa mga office canteens ug smoking areas.
Uyon usab si Pagaran nga bisan ang mga asymptomatics ipailawom sa swab test sanglit wala na ma’y angay kabalak-an sa bayronon tungod kay puwede kining ipaagi diha sa Philhealth state health insurer.
Sa tan-aw ni Pagaran, dili diktadurya ni pagyatak sa tawhanong katungod sa mga mamumuo kon pugson sila nga magpa-swab test sanglit ang katuyoan mao man lamang ang kaluwasan sa tanan gikan sa makamatay nga sakit karon.
Depende na lamang unya sa kagamhanan kon ipaagi ba sa mga kumpanya o magdirekta sila sa mga trabahante nga mo-undergo og swab test, panapos pa ni Pagaran.
RadyoMaN Joel Viray
