WORM-FREE CAPIZ, GUINADUSO NI ROXAS | Anay tiglikom sang DILG, nagpatawag sang sinapol may kaangtanan sa Soil Transmitted Helminthiasis (STH) disease

146

CAPIZ – Nagpatawag sang sinapol sa mga kapitan kag school principal sang mga kabarangayan sa syudad sang Roxas nga may pinakamataas nga kaso sang Soil Transmitted Helminthiasis (STH)disease okon “lugay” si anay DILG Secretary Mar Roxas.
Ini matapos mahibaluan ang pagtuon sang World Health Organization nga ang Western Visayas ang may tuman ka damo nga kaso sang worm infection nga nagaapekto sa 2/3 okon 60 % sang populasyon sang mga Pre-School kag School – Age Children.
Nadiskubrehan sa pagtuon nga ang Brgy. Culasi, Baybay, Dayao, Olotayan kag kaiping nga coastal barangays ang may pinakamadamo nga numero sang kabataan nga may lugay sa probinsya sang Capiz.
Mas guinkaalarma ni Roxas ang pahayag nga apektado sang nasambit nga STH disease ang physical kag brain development sang kabataan sa diin talalupangdon nga kalabanan sa ila mahina ang performance sa eskwelahan, non-numeric, indi makahibalo/ mahinay magbasa, wala nagataas kag malnourished bangud ang sustansya sang mga pagkaon nga ila guinakaon ang nagakadto direkta sa mga lugay sa sulod sang ila lawas.
Ini sunu sa iya ang magatuga sang negatibo nga apekto sa ila buas-damlag. Guin-imbitahan sang anay tiglikom sa sinapopl ang eksperto nga doktor naguikan sa UP-PGH Department of Parasitology nga si Dr. Vicente Y, Belizario, Jr. , MD, MTM & H agud talakayon ang isyu kag mabuligan ang Capiznon nga makadihon sang plano agud dalayon nga matapna ang lugay sa mga kabataan.
Guinpasalig ni Roxas nga personal sini nga pagatutukan ang problema agud mahatagan sang kahigayunan ang tanan nga kabataan sa Capiz nga mapasangkad ang ila kapabilidad kag potensyal.
Guinpangabay man sini ang publiko nga siguruhon ang matinlo nga pagginawi sa ila komunidad agud malikawan ang paglapta sang STH disease sa palibot. Liwat nga magabalik ang grupo ni Dr. Belezario sa Capiz sa masunod nga tatlo ka semana agud i-presentar na ang detalye sang action plan subongman magpatigayon sang on-site inspection sa mga barangay nga may mataas nga kaso sang worm-infection. (Capiz Aksyon News Center)

Facebook Comments