Sa masunod nga mga tinuig magadamo pa ang maga edad na sang 50, naga edad apang aktibo pa nga populasyon, mahilig mag travel bisan diin nga bahin sang kalibutan.
Ang “real-holiday” experience para sa iban amo ang magkadto sa mga isla nga birhin pa, lugar nga mahal ang bayad kag may malahalon nga hotels, ukon maglantaw sang mga polar bears ukon simple mag yoga sa malinong kag matawhay nga lugar.
Kwarta kag tiempo na lang ang kulang suno kay Howard Wolff, senior vice president sang International architecture and design nga kumpanya nga Wimberly Allison Tong & Goo, ukon WATG.
Si Wolff bilang nagapanguna sa pag develop sang konsepto para sa isa ka hotel sa orbit sang kalibutan nagalaum nga matigayon ini pila ka adlaw. Madamo na sang mga kumpaniya ang naga testing sa nagkanuhay-tuhay nga mga salakyan. Ang hotel investment community na intriga sa konsepto pero naga duha-duha pa sa pagbuya sang kwarta para diri. Ang kinahanglan lang suno sa iya amo ang investor nga may madalom sang bulsa kag handa nga mag risgo.
Ang WATG amo man ang sa likud sang ambisyoso nga on-Earth destinations para sa mga travelers sa 130 ka pungsod sa anum ka kontinente, kaangay sang: The Venetian sa Las Vegas; Atlantis, Paradise Island sa Bahamas; kag The Palace of the Lost City sa South Africa.
Suno kay Wolff kag sa iya prediksyon nga ang pinakauna nga hotel sa kahawaan mangin mixed-use nga proyekto nga may komersyal kag research nga aplikasyon para mahapos ang pagpundo sang gasto.
Ang WATG visionary hotel nga konsepto may portion nga may earth gravity para komportable ang mga tawo kaangay sang pag flush sang toilet kag makapaligo sang normal kag may weightless environment para sa mga ekspermento kag para makatilaw man ang mga kliyente sang eksperyensya sang mga astronaut sa kahawaan.
Sa isa ka forum nga ginpangunahan sang Thompson Holidays nga isa ka nagapanguna nga travel and destination group nga na base sa United Kingdom upod ang mga Architects, technologists, travel journalists, mga eksperto sa social trend sang palaabuton kag mga otoridad sa sustainable tourism, ila nahambalan nga matabo lamang ang pagtukod sang mga hotel sa space kon may salakyan na nga barato ang pamasahe padulong didto.
