Opisyal na nga nag-umpisa ang Western Visayas Regional Athletic Association ukon WVRAA meet 2018 pinaagi sa ginhiwat nga opening program kahapon sang hapon sa Iloilo Sports Complex.
Antis ang opening program, isa ka parada ang ginhiwat halin sang Iloilo Provincial Capitol padulong sa Iloilo Sports Complex kon sa diin ginpasakupan ini sang tanan nga delegasyon gikan sa Aklan, Antique, Capiz, Guimaras, Negros Occidental kag Iloilo.
Bug-os naman ang suporta sang mga gobernador sang natungdan nga mga probinsya sa rehiyon 6 nga ginalakipan nanday Antique Governor Rhodora Cadiao, Aklan Governor Florencio Miraflores, Capiz Governor Antonio del Rosario, Guimaras Governor Samuel Gumarin kag Iloilo Governor Arthur Defensor Sr.
Nagtambung man ang mga opisyales sang Department of Education region 6 sa pagpanguna ni Asst. Regional Director Dr. Victor de Gracia.
Ginpangunahan ni Ilonggo olympian Rene Herrera ang ceremonial torch lighting kag pormal nga gindeklarar ni Dep-ed Regional Director Gemma Ledesma ang pagbukas sang WVRAA meet 2018.
