Nagdesisyon ang DEP-ED 6 regional management committee nga dayunon ang Western Visayas Regional Athletics Association meet ukon WVRAA 2020 sa probinsya sang Aklan sa maabot nga marso 21-28 sini nga tuig.
Ini ang ginkumpirmar ni Dr. Lea Belleza, spokesperson sang Dep-ed region 6 matapos maghiwat sang sinapol ang mancom.
Suno kay Belleza nga tentative pa lamang ang nasambit nga petsa nga nahisugtan sang mancom.
Una diri, gin-postpone sang Dep-ed ang 2020 WVRAA nga natalana sa pebrero 15-21 base sa rekomendasyon sang Provincial health office sang Aklan bangud sa ginakabalak-an nga paglapta sang 2019 novel corona virus.
Suno sa Dep-ed nga indi mahimo marisgo ang ikaayong lawas sang kapin 6 mil ka mga delegates sang WVRAA kabangdanan nga ginpaiway ang paghiwat sang nasambit nga sports event.
Kag sa pagsinapol sang regional management committee kahapon, nadesiyunan sang tanan nga 20 schools division offices nga italana ang WVRAA meet sa Marso 21-28, 2020.
