Tres maga alto eligido officiales, miembro del media y otro pa maga personalidad el ya cai na agua despues el fuente hecho de palo ya desbruna amediante ta conduci el que se llama inspection con el maga maproblema projecto den NHA na Rio Hondo enantes aga.
Serca man alas onse del aga cuando el inspection team ta encabesa si Congresista Albee Benitez, el chairman del comitiba del housing and urban development, junto con canda Mayor Beng Climaco-Salazar, Congresista Celso Lobregat, chairman del Public Works and Highways, NHA Regional Director Engr. Al Indanan, junto con otro maga officiales y maga media ya comensa con el inspection na maga casa como el maga houses on stilt del maga IDP na Rio Hondo.
Mientras ta camina sila pasando con el un fuente de palo y cuando ya llega sila na medio parte del fuente, derepente este ya desbruna el maga dormiente y ya cai junto con el maga officiales.
Fuera con el maga officiales, unu tambien del quien ya cay na agua amo si Gil Climaco del EMedia.
Nohay man tambien quien ya sinti duele fuera ya lang ya sale bien muhao estos y dayun ya puede subi para na seco.
El venida di Congresista Benitez tiene que hace con el contrevercial issue del alegao mal hacida del maga housing project para del maga IDPs na ciudad.
