Roxas City, Capiz – Padayon nga ginabulong sa ospital ang 42-anyos nga babaye matapos natiruhan samtang yara sa sulod sang iya Nissan Sentra nga salakyan sa Villa Alegria Subdivision, Barangay Punta Tabuc, Roxas City mga alas 6:00 kagab-i.
Ginkilala ang biktima sa kay Jhonel Arches sang Vista del Rio, Barangay Libas, syudad sang Roxas kag isa ka court employee sang Roxas City Hall of Justice. Sa inisyal nga imbestigasyon sang mga kapulisan, sakay sa motorsiklo ang nagaisahanon nga suspek nga isa ka lalaki.
Nag-angkon sang igo sa paa kag tiil ang biktima kun sa diin nabuka man ang windshield sa drivers seat sang iya salakyan. Suno kay Police Superintendent Dante Tayco, hepe sang Roxas City PNP nga nagapadayon pa ang imbestigasyon sang mga kapulisan agud matumod ang suspek kag ang motibo sang pagpangluthang.
Ginahinyo man sang mga kapulisan si Arches nga magkooperar sa imbestigasyon, agud mapadasig ang pagresolba sang nasambit nga krimen. Samtang, kumpirmado nga isa ka court stenographer sa Regional Trial Court Branch 19 sang Hall of Justice ang biktima.
(c) Google Maps
