MARABUT, SAMAR – Nalipay an mga Yolanda survivors han municipalidad han Marabut, Samar tungod han mahusay nga mga housing units nga gin-pondohan ngan ginhatag han Kuwait Red Crescent Society.
297 nga mga housing units an gintindog ha Barangay Amambucale ngan Barangay Legaspi . 9 million dollars an gin-alotaga nga pondo han Kuwait Red Crescent Society.
Sumala kan Dr. Hilal Al Sayer, Chairman of the Board of Directors han KRCS, an pagigin magsangkay han nasod Pilipinas ngan Kuwait an pinaka una nga rason kun kay-ano andam bumulig an Kuwait ha mga nabiktima han Super Typhoon Yolanda.
An mga residente nga nag-uukoy ha mga no build zone nga lugar ha Marabut an prayoridad nga matagan han mao nga pabalay.
Sumala kan Susana Bagarino, kapitana han Brgy. Amambucale, matapos an Bagyong Yolanda in nawarayan hin kabablayan an kadam-an nga mga residente han iya barangay salit dako gud an ira pasalamat nga matatagan na hin permanente ngan madig-on nga balay an mga residente han iya lugar.
