Yours Truly iFM
December 12, 2019 With RadyoMaN DJ Kat And RadyoMaN Bruno Banana (Photo from web / No Copyright Infringement)
Dear iFM,
Maayong hapon mga bestfriends!
Nagsulat ako sa inyo kay indi na gid ako makaintindi sang dalagan sang amon pangabuhi sang akon bana.
Ako gali si Linda mga bestfriends, isa ka asawa kag may pito ka mga kabataan.
Ang akon bana isa ka tricycle driver. Pero sa kaluoy sang Diyos masarangan pa namon nga pa-eskuwelahon ang amon mga kabataan kay puro pa man sila sa elementary.
Para makabulig ako sa akon bana, nagapanglabada ako mga bestfriends.
Ang indi ko lang mauyunan kay palahubog ang akon bana. Ang iya rason nga amo lang ina ang iya bulong sa kakapoy pagkatapos sang bilog nga adlaw nga pamasada.
Indi ko man ko siya masaway. Ang indi ko lang mauyunan kay kung mahubog gani siya, ginasakit niya ako.
Kung kaisa gaisip ako nga makipagbulag na lang sa iya kay indi na gid ako kaaguwanta sang iya batasan. Pero gaduha-duha ako kay magagmay pa ang amon mga kabataan.
Nagalibog ang ulo ko mga bestfriends. Ano ang maayo ko nga himuon?
Yours Truly,
Linda
