Davao City – Sa pipila na ka dekada ang milabay, ang pagpangita og trabaho ug unsaon pagsugod sa pagtukod og kaugalingong pamilya ang komon kun sagad ginaatubang nga problema sa kalibutan diin base sa website nga parentology.com, wala pa maila ang pulong nga ‘teenager’ hangtod 1920s gani sa pagkakaron, mahulagway nga ‘unique’ na ang problema sa kabatan-onan.
Acceptance, stress, depression, ug anxiety – kini ang nag-una nga mga problema sa mga millenials sa tuig 2019 base usab sa maong website.
Mao usab kini ang mga concerns kun prayoridad nga tutukan sa usa ka youth leader ug Sangguniang Kabataan Chairperson sa Barangay Mintal ning syudad sa Davao nga si Kendall Joyce Abrio kinsa nag-ingon nga ang mental health problem adunay dakung epekto sa ilang pagkabatan-on.
“Kay nakita namo na once affected na (ang) ilang mental health, mag follow na ang uban nilang problems nga mag-trigger pa sa uban pang problema sa community, for example mag-lead to bullying, early pregnancy, mag-commit og petty crimes ug uban pa,” segun ni Abrio.
Gi-angkon niini pinaagi sa kompirmasyon sa ilang barangay social worker nga adunay mga batan-on nga misulay og kutlo sa ilang kinabuhi ug gumikan niini, gihatagan nila og atensyon nga gawas sa pagtutok sa paghatag og impormasyon ngadto sa kabatan-onan, gilantaw usab niini ang pagduol mismo ngadto sa mga ginikanan.
“Hatagan pod sila (ginikanan) og information nga makatabang kung unsa ang ilang pwedeng bantayan o pwede mabuhat, if ever naay ginadala nga problema ilang mga anak,” saysay sa youth leader.
Sa tuig 2019, gitutukan sa Barangay Mintal Youth ang Children in Conflict with the Law (CICL) diin gipanghatagan nila og livelihood programs ang maong sektor diin usa usab sa ilang gihatagan og panginabuhian mao ang mga teenage parents sama sa marketing strategies sa mga adunay online shop ug uban pa.
“Kay gusto namo ipakita sa ila nga ang SK dili lang sa mga singles apan sa mga nad edad 16-30 years old,” dugang ni Abrio.
Samtang mensahe niini ngadto sa uban pang kabatan-onan sa bag-ong tuig 2020 mao ang pagsulbad sa mga problema ‘one at a time’ diin dili makatabang ang paghuna-huna sa problema sanglit dugang lamang kini sa imong suliran ug nga mas maayong tudloan nga higugmaon ang kaugalingon.
“Kung naa may problema sa kinabuhi, isa-isahon lang nato og solve ug huna-hunaon nato nga adunay mga tawo nga willing mutabang sa atoa,” dugang saysay ni Abrio.
RadyoMaN Jason Amisola
