Davao City – “Peaceful nga election and mopalambo pa’g samot ang syudad sa Davao”
“Sa umaabot nga election mas maging wise ang mga tao sa pagpili sa mga nidagan nga kandidato”
Eleksyon na usab: Dungan sa mga saad sa mga magpapili ang paglaum sa mga botante nga matuman ang mga plataporma sa kandidato aron sila matabangan diin pipila sa hugot nga nangandoy niini mao ang sektor sa kabatan-onan ug mga Overseas Filipino Workers kun OFWs.
Nahinabi sa DXDC 621 RMN Davao si Robelyn Cabayao, lumulupyo sa Marilog District, Davao City, kinsa kapin upat ka tuig na nga OFW sa nasud sa Saudi Arabia.
Saysay ni Robelyn nga mao kini ang unang higayon nga maka-botar siya isip OFW gumikan sa ka-strikto sa balaud sa iyang gi-alagarang nasud.
“Sa Saudi Arabia man gud, bawal gyud sa amoa ang mag gawas-gawas, kinahanglan naa among madame o driver na magkuyog sa amoa,” sugilon ni Robelyn.
Gani karon malipayon kini nga magamit niya pag-usab ang iyang katungod sa pagpili sa ibutang sa katungdanan ilabi na nga ubay-ubay ang mga isyu nga gikalambigitan nila nga mga trabahante sa gawas.
“Sa ingon niini nga pamaagi matabangan namo ang matag usa kung kinsa nga mga opisyal ang maduolan namo kung adunay mahitabo namo didto sa gawas ilabi na karon nga daghan kaayo’g panghitabo nga wala nato nabal-an,” matud niini.
Simple lang ang mga kwalipikasyon ni Robelyn: Matinabangon ug kayang muatubang sa mga opisyal sa ubang nasud ang kandidato nga iyang iboto.
Hinuon nanghinaot usab kini nga mahatagan og bakasyon ang uban pang OFWs ilabi na niadtong atua sa Saudi Arabia sa ilang mga agalon aron sila makahigayon og pili sa ilang gusto ibutang sa pwesto.
Samtang si Marlo Joshua Brua, batan-on nga taga-Brgy. Mintal ning syudad, buot iboto ang usa ka kandidato nga limpyo ang record, nasayod sa dagan sa gobyerno aron hapsay ang pagdumala niini sa ginsakpan ingon man adunay agi pinaagi sa mga napasar nga balaud o ordinansa.
“Daghang nidagan nga candidates karon, kada isa sa ila naay qualifications, di unta ta magpa-ilad sa ilang mga dagway… atong tan-awon ilang track records kay importante kaayo nga makaluklok ta og kandidato nga angayn gyod,”
Gidugang ni Marlo nga isip usaka ka public servant sanglit siya usa ka SK Kagawad sa maong barangay, usa sa ginaduso niini mao ang allowances alang nila nga gipili sa katawhan kay dakung tabang kini aron sila makalihok sa mga nakahan-ay nga mga programa.
Si Robelyn ug Marlo nga gikan sa sektor sa kabatan-onan ug OFWs duha lamang sa kapin 61 mil ka mga registered voters sa nasud-Pilipinas nga naglaum og kabag-ohan ingon man ang pagbaton sa usaka progresibong nasud.
Gani giawhag sa duruha ang mga nahilakip sa maong mga sektor nga mubotar ug batasanon kini nga katungod sanglit kita-kita ra usab ang ma-apektohan kung dili maayo ang mabutang diha sa katungdanan.
RadyoMaN Jason Amisola
