Davao City – Nanawagan karon ang usa ka youth organization ngadto sa mga kabatan-onan nga magbaton og pangandoy sa kinabuhi diin kini magsugod diha sa edukasyon.
Sa pakighinabi sa DXDC RMN Davao kang Kenneth E. Tagaro, Youth for Peace Eastern Mindanao Council Chairperson, gipasabot niini nga adunay kapaingnan ang batan-on nga adunay ambisyon sa kinabuhi.
“Mangambisyon kita nga makahuman og pag eskwela kay walay luna gayud niining atoang dapit kung dili ka maantigo sa pag eskwela ni pagsulat sa imong ngalan,” saysay ni Tagaro.
Segun ni Tagaro nga angay mangandoy ang mga batan-on taliwala sa kalisod nga nasinatian, inubanan sa tabang sa Ginoo. Samtang, nanawagan kini sa mga kabatan-onan nga aktibong mo-partisipar sa mga aktibidad diha sa ilang lokalidad.
“Ako naga awhag sa atong kabatan-onan karon nga unta maki-alam ta sa unsa mang sitwasyon nga naa sa atong palibot. Makihilambigit kita. Makipagsandurot kita sa unsa mang kaayohan nga giduso sa pang gobyerno o sa pribado man nga mga ahensya para sa kalambuan sa atong lugar,” saysay niini.
RadyoMaN Kirby Manzon
