Davao City – Aktibo ang grupong Lanog sa Tingog Kabataan sa Davao Del Norte sa paglusad og nagkadaiya nga kalihukan alang sa mga kabatan-onan sa nasangpit nga probinsiya isip pagtabang sa kagamhanan sa nasud sa pagpromotar sa mga programa alang sa youth sector.
Matud sa Lanog Founder nga si Dr.Faith Prieto, lahi-lahi nga aktibidad ug programa ang ilang ginahimo alang sa mga kabataan nga adunay tumong sa pagsalbar kanila gikan sa bisyo ug kahilayan nga magdaut unya sa ilang maayong kaugmaon.
Sigun ni Prieto, kabahin sa ilang kalihukan mao ang pagpahigayon og seminar, training, education campaign kontra bisyo, sports ug pagdasig kanila sa pagtinarong og tungha diin daku kining tabang aron mamahimo silang produktibo ug galamiton sa katilingban ug dili pasaway sa gobyerno.
Giingon ni Prieto nga ang ilang gibuhat tubag sa kakulangon sa National Youth Commission ug Sangguniang Kabataan diha sa pagpatuman og mga programa nga ikaayo sa youth sector sanglit masabtan nga dili pupaigo ang pundo nga gitagana sa gobyerno alang sa panginahanglanon sa mga kabataan karon.
Nagtoo si Prieto nga bisa’g sa ginagmay nga paningkamot, makaabag ang ilang organisasyon sa pagsalbar sa mga kabataan gikan sa bisyo ug kahilayan nga mupatay sa damgo sa ilang kinabuhi.
Samtang gipaburan ni Prieto ang pagpakusog sa ‘curfew hour’ kun pagpanakop sa mga bata nga maglatagaw sa kadalanan bisan dis-oras nasa kagabhion diin ang uban kanila malambigit pa sa ‘gang riots’ ug uban pa nga maghatud kanila sa peligroso nga mga sitwasyon.
RadyoMaN Joel Viray
